.
.
فساد الجيش : اصبح حقيقة بلا دلائل .. تكرار الكلمة أصبح حقيقة غير قابلة للشك أو المراجعة
لدرجة انّك لو قلت لحد عايز ادلّة على فساد الجيش .. ممكن يكفّرك أو يقول عليك مختل عقليّاً
مقتنع تماماً أن الفترة الّي فاتت كان الفساد في كلّ المؤسسات
و المؤسسة العسكريّة طالها الفساد ..
بس فساد الجيش مختلف .. فساد الجيش يتمثّل في حاجتين :
1- مخصصات الضبّاط.. من منتجعات و نوادي و مساكن .. في أجمل البقاع و أفضل الأسعار
2- تقنين رواتب كبار الضبّاظ بأرقام عالية .. في حين أن العساكر يتقاضوا اللمم .. لغاية ما يترقّى لرتبة جيّدة .. يعني ... اعتباراً من مقدّم مثلاً
+ سوء الادارة في بعض المواقف
لكن مثلاً ... الجيش هوّ المؤسسة الوحيدة الّي مفيهاش رشوة فعلاً
لو تفتكروا أيام مبارك ان كل الأعمال الّي عايزين نعملها كويّس ... كنّا بنديها للقوات المسلّحة
بتتنفذ في أسرع وقت و بأحسن كفاءة ..
تذكّر أن أفضل المستشفيات هي مستشفيات القوّات المسلحة
تصليح فساد الجيش ... هو الاعلان عن ميزانية الجيش و مراقبتها .. و توزيعها بشكل أعدل على الرتب المختلفة
عمالة الجيش : دي بقى تنساها ... انا كنت شاكك بصراحة
بس بعد ما سمعت كلام سليمان و مؤمن (أصدقاء مجنّدين) .. العقيدة القتاليّة للجيش .. ثابتة و راسخة ... اسرائيل
يعني قادة الكتائب مثلاً .. مشحونين بطريقة فظيعة تجاه اسرائيل ... نفسهم حد يقولّهم أطلعوا على سيناء
و لو قادتهم تواطأت لتنفيذ مصالح اسرائيلية... الجيش هيحصل فيه انقلاب + ان معظم قادة الجيش حسّوا بالإهانة أيام توقيع اتفاقيةالسلام
صفقة الجيش مع مبارك :
الله اعلم بحقيقة الموضوع دة .. بس أظن انّه مش عايزين يعملوا حاجة بأيديهم .. عايزينها قانوني .. و يبقى القانون هوّ الّي جابه و احنا مالناش دعوة
...
الطريق إلى جهنّم مرصوف بالنوايا الطيّبة
...
ضبّاظ التحرير: أشك في عدم انتمائهم للقوات المسلحة .. مفيش حد مستعدّ ينتحل شخصية ضابط .. و يعمل الّي عملوه ..
الناس دي فعلاً فدائية و وطنية إلى أقصى حد .. بس للأسف حماسة غير عاقلة
انت لا عرفت تجمّع عدد منطقي للقيام بانقلاب على تباطؤ في اتخاذ قرارات ... و لا تظاهرت سلميّاً بصفتك مصري مدني
حماستك و وطنيّتك خلّوك تقف لوحدك امام مؤسسة عسكرية وطنية ... حدوث انشقاق فيها هيبقى على جثتهم و جثة الشعب
لا قيادات الجيش و لا الشعب هيسمحولك ... و أظن الّي كانوا في التحرير امبارح شافوا ازاي الناس طردتهم من على المنصّة .. وهات يا بهدلة
خلّي بالك ان الناس الّي كانوا في التحرير دول مش بتوع احنا آسفين يا ريّس ... مش حزب ربّات البيوت يعني ...
الناس دي هيّ الّي عملت الثورة .. و لو شافت الّي انت عملته مفيد للثورة .. كانت كل الجماهير ساندتك
..
.. معتصمو الليل
..
شهادة :
بعدما تم طرد الضباط من عند المنصّة الرئيسية .. كنت عايز أعرف ردود الفعل .. اتّجهت ناحية المنصّة و بدأت أتكلم مع مجموعة من الناس حول الموقف
( نزولي الميدان من يوم السبت 29/1 .. كان لازم الف الميدان حتّة حتّة و افتح حوار مع كل من استطيع و اسمع نقاشات قدر ما أحتمل .. بالاضافة للأعمال الأخرى .. هحكي الكلام دة بإذن الله في وقته)
كان رأي الناس أن الجيش فيه فساد ... بس لا يمكن نسمح لانقسامات في الجيش دلوقتي
و احنا بنتكلّم .. شاورت امرأة على مجموعة من البشر خلف المنصّة .. فوق محل متهدّم .. كان بيستخدم كـ صيدلية ما قبل التنحّي
الوصف : بلطجيّة ... لا يمكن الّي يشوفهم بيقول غير كدة ... ملمومين على بعض .. و بعضهم ماسك علم مصر و لافتات مكتوب عليها محاكمة صفوت و زكريا و سرور .. و ما إلى ذلك
كان بعضهم ماسك اكياس فيها حاجات مش عارف ايه هيّ .. و واقفين في تربّص .. لا بيسمعوا الّي على المنصّة و لا بيهتفوا .. و قاعدين يبصّوا يمين و شمال
ساعتها قلت في نفسي : الليلة دي مش هتعدّي على خير
...
قطعاً في ناس تعاطفت مع الضبّاط .. الضبّاط دول فعلاً باعوا نفسهم بنيّة طيّبة
..
دي المعطيات
و
النتائج:
اعتصم بعض الناس في الميدان .. تعاطفاً مع الجنود... الّي لو اتسلموا للجيش هتبقى نهايتهم
برفقتهم مجموعة من البلطجيّة الذين يحملون .. اكياس فيها حاجات مش عارف ايه هيّ
جاء الجيش ليلاً ليخلي الميدان ... طلب من الشباب تسليم الضبّاط .. و قالّهم ندّيهم وقت يروّحوا و مش هنعملّهم حاجة (شهادة صفوت حجازي)
طبعاً الشباب رفضوا تسليمهم ... اكيد الجيش هياخدهم ...
قالّهم هانجيبهم بالقوّة .. جيش مع جيش .. و المدنيين مالهمش دعوة ...الشباب رفضوا... (شهادة صفوت حجازي)
الجيش قال مابدّهاش ... و بدأ في فض الاعتصام للقبض على ضبّاط الجيش المنشقين
و بدأ دور البلطجية في التعدي على الجيش ...
و في نفس الوقت في ناس مسالمة متعاطفة مع الضباط المساكين .. شعرت ان التصعيد ضدّها
و النتيجة هي الموقف الهباب الّي احنا فيه دلوقتي
...
انا مصدّق كلام الجنود المخلصين دول
و مصدّق كلام الناس الّي بتقول الجيش استخدم القوة في فض الاعتصام
و مصدّق كلام الجيش الّي بيقول ان الأوامر كانت عدم التعدّي على المواطنين في فض الاعتصام ( بعد الهوجة الّي حصلت في يوم " و رصيدنا لديكم يسمح " + كليّة الاعلام)
(الجيش معندوش استعداد يضّحي بثقة الناس فيه ... و رايح جاي في مؤتمرات صحفية و تحقيقات )
و مصّدق ان كان في بلطجيّة في الميدان
..
ابحث عن المستفيد ...
